荷里活亚裔演员抬头，其中一位上位冒起中嘅Gemma Chan(陈静），十年前仲係Benedict Cumberbatch嘅《新福尔摩斯》其中一集嘅角色，十年后嘅今日已经担大旗做女主角兼监制。
外媒Hollywood Reporter报导，Gemma 会同同样係亚裔嘅制作人合作新project，係第一位荷里活华裔女星黄柳霜(Anna May Wong)嘅传记片。剧本改编自黄柳霜嘅传记书，并由首位获得舞台剧东尼奖最佳编剧嘅亚裔创作人David Henry Hwang执笔，而黄柳霜嘅姨甥女Anna Wong就担任电影嘅顾问。
陈静发文确认消息，提到黄柳霜係超越时代嘅女性先锋，带来好多前所未有嘅转变，亦同样面对亚裔面孔带来嘅偏见。
黄柳霜1905年生于美国洛杉矶，14岁入行，17岁拍电影《海逝》而大红，喺演艺圈42年间拍戏60套，见证住电影由默片走向有声有画有颜色嘅世代。当年有导演搵黄柳霜演黄皮肤角色，点知公司唔批，仲搵个德国女演员取代。黄柳霜后来转战电视界，拍节目The Gallery of Madame Liu-Tsong成为当地首位亚裔主持。1961年黄因急病逝世，终年56岁，生命虽然短暂，但成为荷里活亚裔演员先驱，洛杉矶嘅星光大道只有5个华人佔一席位，黄柳霜係其中一个。
Gemma 旧年参加星光熠熠嘅纽约大都会博物馆晚宴(MET Gala)，造型正正係向黄柳霜致敬，原来拣呢个造型係有原因！暂时未知电影几时开工同映期，不过近年传记片都係奖项大热，Gemma 做得好的话随时有奖拎！
